د.مهند عثمان التوم
dr.mohaned@mohanedosman.com
واحد صاحبي رسل لي فيديو لمسيرة تم اسقاطها وسألني عن رائي رغم علمه بأني لا اهتم بفيديوهات الحرب لانا الواحد فيها ما بكون عارف بشاهد بوليوود ولا هوليوود، بعدين الفيديوهات كلها للكبار+18 واخوكم زول عمري في الكتابة الصحفية 7سنوات يعني يادوب خريج روضة وزول أولي تأكل الفولة عشان أمشي تانية اكل الباسطة.
اسمع يا صاحبي الحكاية دي بقت زي الونسة في ضل الضحى معقولة مسيرة تسقط واقفة بعجلاتها خدشة ساكت كده مافي ولا لستك مطرشق، بكون هي عشان طيارة صغيرة بتعمل ون ون في السما زي دبورة جعانة نزلها شيخ بدران بالسبحة بس ما هو المفتي العام اسي الخلاني اجيب سيرة الشيخ بدران شنو يمشي يدعي لي كمان اصلا ما بتصل لكن الخوف من لسانه يقول لي عبدالله ابن سلول لو ما قال مسيلمة الكذاب، غايتو صحي الدنيا كركبة صفايح
اسي يظهر واحد يطلع لينا شيخ بدران ده من نسل أهل الكهف ولو ما خجل يقول جده الرسول عديل كده، ياخي الزول ده بقى زي الأساطير شعره ده ما شفته الا في فيلم اللمبي بتاع الجاهلية، بدران ده تلقاهو كل يوم والتاني طالع لينا بفتاوي مرة بخبر الطيور علامة من علامات اخير الناس وهادي البشرية ومرة فك ليهو بكية كأنه مسجون ظلماً والا اتسجن جوج ويا جوج، بدران قال كرامته صدت الذخيرة منه وانه محمي من الاله من طلع زول ساكت اسي لو كان قال لا يصيبنا الا ما كتب الله ما كان قلنا بدران ولي صالح لكن قالوا في الجرية بقي زي روبن هود في الافلام ولا احسن بتاعنا ود كاكا بدران ده اخر خارجياته قال عنده حجاب المسيرات تشويش رباني تشويش الهي يأتي من جل جلاله(استغفر الله) لا تضربك مسيرة ولا سلاح ولا طائر، الشغلانة دي نطت الروحنيات ده بكون صنف جديد ولا شراب مريسة ساكت حقت عبدالباري وقت قال المريسة عادات وتقاليد.
المواطن السوداني مسكين وفروا ليه افلام في ظل عدم وجود كهرباء يفتح التلفون ويشاهد كل يوم والتاني مشاهد دون اي مونتاج كأنهم فاتحين شركة مونتاج سايبة تقدير ظرف ادفع حق الانترنت بس والباقي علينا كل زول يعمل الدايرو ومافي زول يحاسبو؟
بعد ده يا صاحبي ندخل في موضوع الفيديو أنا من الآخر كدة ما مقتنع بمسألة اسقاط المسيرة أكيد في إنّ(بتشديد النون) في الموضوع، فالقوات المسلحة السودانية الطرف الأكثر تضرر من مشهد فيديو المسيرة، فإذا ثبت أن الطائرة المسيرة تابعة لها بالفعل فإن ذلك سيثير تساؤلات خطيرة كيف تسقط المسيرة دون اي أثر حطام او اصابات بهيكل الطائرة، يا صاحبي قالننتظر توضيح رسمي حول هذا الفيديو، لأن لا بد للقوات المسلحة إصدار بيان يوضح حقيقة الأمر؟ حتي تنقشع الملابسات عن سقوط الطائرة المسيرة أونفيها؟ أم أن الأمور ستظل طي الكتمان وستبقى هذه القضية لغز محير يؤرق الجميع دون اجابة شافية.
السؤال الأهم ما هي الرسالة التي أراد السافنا توجيهها من خلال هذا الفيديو؟ هل هي محاولة لإثبات قوته ونفوذه؟ أم أنها جزء من لعبة أكبر؟
يا صاحبي أعلم أن الإجابة غير شافية لانا الفيديو لاسقاط طائرة سليمة كانها بالمدرج للإقلاع ان قلت اكثر مما قلته احسبني من مريدي شيخ بدران فالخيوط يا صاحبي متشابكة والواقع معقد، لكن المؤكد هو أن الفيديو سيكون حديث الساعة في السودان وستلقي بظلالها على المشاهد لبعض الوقت، والعنكبوت باعينه المتعددة شاف.
يمكنك مشاركة هذا المحتوى :
